ചെമ്മരുതി ഗ്രാമപഞ്ചായത്ത് ബഡ്സ് സ്കൂളിൽ സംഘടിപ്പിച്ച യോഗാദിനാഘോഷം ഗ്രാമപഞ്ചായത്ത് പ്രസിഡന്റ് രാരിഷ് ജി. ഉദ്ഘാടനം ചെയ്തു. പഞ്ചായത്ത് അംഗങ്ങളായ ഗീതാകുമാരി, അനീഷ്, രാകേഷ് ബാബു, മഹേഷ് സലാല, ആതിര, സിമി, സുരാജ് തുടങ്ങിയവർ ചടങ്ങിൽ പങ്കെടുത്തു. യോഗ പരിശീലക ശ്രീമതി ആതിര കുട്ടികൾക്ക് യോഗ പരിശീലനം നൽകി. ശാരീരികവും മാനസികവുമായ ആരോഗ്യത്തിനൊപ്പം ആത്മവിശ്വാസവും ഏകാഗ്രതയും വളർത്തുന്നതിൽ യോഗയ്ക്ക് വലിയ പ്രാധാന്യമുണ്ട്. പ്രത്യേകിച്ച് വിഭിന്നശേഷിക്കാരായ കുട്ടികൾക്ക് നിരന്തരമായ യോഗ പരിശീലനം അവരുടെ ശാരീരിക ചലനശേഷി, മാനസിക ഉണർവ്, ആത്മവിശ്വാസം, സാമൂഹിക ഇടപെടൽ എന്നിവയിൽ ഗുണകരമായ മാറ്റങ്ങൾ സൃഷ്ടിക്കാൻ സഹായിക്കും. ബഡ്സ് സ്കൂളിൽ യോഗ പരിശീലനം തുടർച്ചയായി സംഘടിപ്പിക്കുന്നതിലൂടെ കുട്ടികളുടെ കഴിവുകളെ പരിപോഷിപ്പിക്കാനും അവരുടെ ജീവിതത്തിലേക്ക് കൂടുതൽ സന്തോഷവും ആത്മവിശ്വാസവും കൊണ്ടുവരാനും സാധിക്കും. ഓരോ കുട്ടിയുടെയും കഴിവുകളെ തിരിച്ചറിഞ്ഞ് അവർക്കൊപ്പം നിൽക്കുക എന്നത് സമൂഹത്തിന്റെ കൂട്ടായ ഉത്തരവാദിത്വമാണ്. അവരുടെ സ്വപ്നങ്ങൾക്ക് അതിരുകളില്ലാത്ത ഒരു ലോകം ഒരുക്കാം. കരുതലിന്റെയും സ്നേഹത്തിന്റെയും പിന്തുണയുടെയും ചിറകുകളിലേറി നമ്മുടെ കുഞ്ഞുങ്ങൾക്ക് സ്വന്തം ആകാശത്തിലേക്ക് ഉയർന്ന് പറക്കാൻ സാധിക്കട്ടെ.
